PMEG

39.1.13. IĈ°

“Virbesto, viro, masklo”. Unu el multaj proponoj de sufikso por montri viran sekson. IĈ estas nun (en la jaro 2016) la plej populara propono de tia sufikso, sed ĝi tute ne estas ĝenerale uzata, kaj multaj ne konas ĝin: bovo *boviĉo* = “virbovo”, kato *katiĉo* = “virkato”, kuracisto *kuracistiĉo* = “vira kuracisto”. IĈ parencas al la sufikso ĈJ, same kiel IN parencas al la sufikso NJ. Normale oni uzas vira aŭ prefiksecan VIR.

Iuj volas uzi IĈ ankaŭ ĉe viraj radikoj, kies signifon ili do volas ŝanĝi al sekse neŭtra: patro (neŭtra) *patriĉo* = “patro”, knabo (neŭtra) *knabiĉo* = “knabo”, viro (neŭtra) *viriĉo* = “viro”. Tiel drastaj signifoŝanĝoj de oftaj kaj firme enradikiĝintaj vortoj estus vera reformo de la lingvo, kaj tial malfacile realigebla. Por esti konsekvenca oni devus tiam neŭtrigi ankaŭ inajn radikojn: damo (neŭtra) *damino*, *damiĉo*; nimfo (neŭtra) *nimfino*, *nimfiĉo*; putino (neŭtra!) *putinino*, *putiniĉo*.

Legu ankaŭ pri seksa signifo de radikoj kaj O-vortoj.